黃智雯（Mandy）喺2023年突然宣布與拍拖11年嘅珠寶集團高層男友Anthony（詹文天）結婚，Mandy婚後繼續努力工作，生B計劃順其自然，Mandy日前為代言美容品牌性感上陣拍攝廣告，露玉背又曬低胸美腿，展現完美體態。
Mandy笑言今次拍攝係佢婚後首次大解放，為咗以最佳狀態示人，事前做足準備，要老公陪佢整整一個月冇飽飯食，Mandy早前完成舞台劇《薄伽梵歌》後，瞬即又要為代言美容品牌拍攝廣告，Mandy直言演舞台劇壓力大，徹夜難眠，足足瘦咗7、8磅，Mandy為拍廣告，首要準備係調整身心，盡量休息瞓多啲，而佢喺體態上亦要做準備，例如護膚、飲食上又要食得乾淨啲，少糖少油少鹽。
Mandy今次拍廣告以兩個性感造型登場，已為人妻嘅Mandy話拍嗰陣有幾個鏡頭，令佢諗起影婚紗相，因為白色裙又有紗，好有着婚紗嘅感覺，Mandy又指今次冇特別同老公講有幾性感，因為老公唔會過問佢嘅工作，最緊要性感得嚟健康，反而老公得知愛妻要演舞台劇同拍廣告，就陪老婆食得健康啲，食蛋、食雞胸，Mandy爆老公冇瘦，因為老公夜晚會去偷食零食。
Mandy直言最滿意自己背脊，佢自豪表示：「個個人見過我背脊都話靚，冇暗瘡喎。其實我每星期都有做磨砂，好好護理背脊，反而前面（胸）夠就可以，自己比較喜歡骨感。」 此外，貪靚嘅Mandy更自封美容達人：「可能因為媽媽從事美容行業多年，所以自小已俾佢灌輸好多護膚心得，而家無論幾忙都好，我會日日敷Mask，但唔知點解我啲Girl Friends胡說八道會，佢哋唔信我日日敷面膜，但佢哋同我出trip後，就知道我真係每日都做。」
