杜德偉下月將相隔10年再踏紅館，出道40年嘅Alex喺圈中廣結良緣，近日一班老友就拍片，為身處美國巡唱嘅Alex送上驚喜，當中有同期出道嘅張學友大讚Alex係少見善良嘅人，每次見面都令身邊朋友帶嚟歡樂，係一名窩心暖男，學友仲清唱Alex嘅經典歌《信自己》同《鍾愛一生》，令Alex喜出望外。
葉蒨文當年與Alex合唱《信自己》，佢話至今仍非常回味：「《信自己》真係周圍唱、周圍跳。嗰陣時成日跳舞、唱歌，所以我好開心同Alex合唱咗呢首咁精彩嘅作品。一個美好嘅回憶。」
自認係Alex忠粉嘅張繼聰，話早喺演藝學院考試時係必唱Alex嘅歌曲，更影響佢喺音樂上面嘅創作，阿聰仲話：「我聽過嘅好嘢，一定推介埋俾我下一代！」佢就同囡囡Kakaball跟隨《信自己》嘅強勁拍子起舞，Alex不禁大讚兩人跳得好。
至於麥浚龍同Alex嘅合作，兩人結緣於一部電影，喺Juno眼中，佢覺得Alex係好清楚點樣用肢體說話嘅音樂人，彼此溝通更可以用音樂作不同情感比喻，而Alex歌曲之中，《無心傷害》係佢最深印象嘅一首，其獨特聲線好動聽。
Alex收到朋友們嘅意外驚喜，非常感動。啱啱完成洛杉磯同三藩市兩場巡唱，原來對上一次喺美加開騷經已係10年前，面對熱情嘅觀眾，可惜因超時而未能encore，而意猶未盡嘅觀眾更一度唔肯離場，令Alex感到無奈，惟有下次再開騷補償畀大家。完成美加站之後，Alex將全程投入紅館綵排。
