王鎮泉 Jeoffrey 每星期為觀眾提供最熱辣電影資訊，中外猛片專訪花絮上映時間全部集齊，「電影泉攻略」個個星期陪你睇新戲。
邱以太同導演蔡佳穎作客「影人Talk」環節，跟泉叔傾談新戲，以太喺戲中要作出從演以嚟最大挑戰，就係全裸，然後再被掐頸懸掛喺半空。以太話拍攝時好凍，但呢個溫度反而令佢更投入，例如嘴唇會自然變紫，身體抖震。
拍攝當刻，導演只留下必要嘅工作人員，以太話大家好照顧佢，導演一喊「cut」，大家就用毛巾為佢保暖。拍攝全裸戲份，以太覺得最尷尬同緊張嘅時候，係佢要喺帳篷準備出嚟一刻，因為會諗大家有乜反應。
談到拍攝驚悚電影，蔡導演話要拜拜神，通知聲靈界嘅朋友，亦會封紅包畀拍攝死亡嘅演員，講到電影有個別名叫「Angela的一百種死法」時，蔡導演笑言Angela不知拿拎咗幾多紅包。
本周電影新片速遞：
《詭屋驚凶實錄4：最後的儀式》係全球票房突破20億美元嘅「Conjuring宇宙」第9部電影，亦係終極之作。故事改編自華倫夫婦真實檔案中最令人毛骨悚然嘅一宗案件，看似普通嘅驅魔案件逐漸失控，呢對靈異調查搭檔赫然發現自己對抗緊嘅邪惡力量，已經遠遠超過一切預計嘅想像。
《玫瑰夫大戰玫瑰妻》，艾菲同菲奧係眾人心目中嘅「模範夫妻」，一家四口家庭生活看似甜甜蜜蜜，但一場令菲奧事業插水嘅意外，竟然係艾菲事業起飛嘅契機！呢對好勝夫妻分歧愈多，怨念積累愈深，「霉爆」夫大鬥「玫瑰」妻，相愛相殺之戰蓄勢待發！
《南京照相館》一班素不相識嘅老百姓，喺1937年嘅南京城，因一卷記錄日軍暴行嘅膠片意外被命運捆綁。影片故事取材於南京大屠殺期間，日軍真實罪證影像。一群生活喺南京百姓匿埋喺吉祥照相館中避難，為咗盡可能多生存一日，佢哋被迫幫助日軍攝影師沖洗底片，卻意外沖印出能夠證明日軍屠城嘅罪證照片。
《我的鄰居是惡魔》每日用心烤麵包，夢想能夠去法國留學，生得清純甜美嘅平凡女子鄭善智，其實有個連自己都唔知道嘅秘密：每到午夜就會變身成可怕惡魔。佢嘅鄰居吉久辭職後過著天天宅喺屋企嘅生活，見到善智後就對佢產生情愫，意外發現咗佢嘅秘密。
今個星期票房龍虎榜第一位《「鬼滅之刃」無限城篇》、第二位《無名指》、第三位《F1電影》
