佘詩曼Charmaine Sheh放完假叉足電後重投工作現身品牌活動， 日前又為《新聞女王2》配音，阿佘都有分享能夠先睹為快嘅心情，自己同全劇演員一樣好想睇到整套劇集製成品，希望觀眾會喜歡佢哋嘅演出。
講到日前同譚俊彥碰頭配音，阿佘話當下感覺返晒嚟，勾起拍攝時回憶，又聽聞《新聞女王2》將會於11月推出，現在做後期中，阿佘為咗迎合新劇推出，特意喺呢段時間唔接工作，希望專心做好宣傳。
早前阿佘同圈中好友「七魔女」湯盈盈、周家蔚、梁靖琪等相約一齊去布吉旅行，但連續兩年都獨欠文頌嫻一人，即時惹嚟不和猜測，阿佘親自解開謎團話今年因為撞正文頌嫻個女生日，極力游說佢都唔肯一齊，笑言自己失寵有啲嬲，而舊年就係文頌嫻個女考試，大家都好難夾啱咁多人。
阿佘日前同好友食飯遇上馬貫東，交流時得知對方近日成為寵物美容師，所以就將愛犬Gaga交俾馬貫東設計新髮型，知道佢為Gaga剪毛前都特意進行六、七次嘅實習，好彩最後阿佘都收貨成為馬貫東嘅強心針。
