游乃海自編自導；改編自經典港產作品《跟蹤》嘅電影新作《捕風追影》，由成龍、梁家輝、張子楓、此沙、文俊輝、林秋楠等等合作演出。早前於內地率先上畫，高踞每日賣座冠軍之餘，票房更已突破10億。相隔20年再度合作嘅成龍、梁家輝一正一邪擦出新火花，加上此沙、男團SEVENTEEN成員文俊輝、林秋楠等年輕實力派演員合作，個個睇得又打得，下星期四(11日)亦正式於香港上映。
《捕風追影》日前舉行好友優先場，圈中台前幕後嘉賓聞「風」搶閘欣賞，男主角梁家輝亦親臨戲院，同姜皓文、黃百鳴、黃錦燊等好友敘舊，又親切與一班後輩合照留念，到場嘉賓仲包括多位導演。
於片中有突破性演出嘅家輝哥在雖然早已身經百戰，不過直言呢晚心情帶緊張：「希望大家睇戲之後，會幫我哋宣傳一下，將香港觀眾再帶入戲院，如今全世界電影業都處於一個唔算太好嘅時間，好難得《捕風追影》可以喺香港上映，喺戲院睇戲，總好過家庭影院或者平板電腦上睇，感覺完全唔同！」
《捕風追影》亦入圍第30屆釜山國際電影節，家輝哥更應邀擔任評審團成員：「我唔覺得擔任評審好威水，但呢次戲中嘅養子韓國男團SEVENTEEN成員文俊輝會跟我一齊去當地宣傳，佢喺韓國好紅，希望帶領我哋威返一次！」
家輝哥仲發現，電影節其中一位評審竟同《捕風追影》有微妙關係：「唔知係唔係緣份，評審團其中一位成員，竟然係韓國版《跟蹤》(《天眼跟蹤》)女主角韓孝周！亦即係話，三代《跟蹤》的女主角，香港(徐子珊)、韓國(韓孝周)同內地(張子楓)，我都有合作機會，希望《捕風追影》大受歡迎，其他所有國家都買版權重拍，當然最希望我可以繼續演出！」
至於最近再做外公嘅家輝哥會唔會趁機帶家人到當地遊玩？佢就笑言：「呢個係大問題，因為我哋幾代同堂，屋企人口眾多，每次去旅行都好似移民咁帶好多行李，希望完成釜山之旅後，可以搵個時間，同家人近近哋喺香港旅遊一下！」
近期有兩部電影同時上映嘅姜皓文(黑哥)，亦特別抽空到場支持新作，原來佢同家輝哥上一次見面，已係4年前宣傳電影《金錢帝國：追虎擒龍》，黑哥仲話非常希望挑戰激烈動作場面：「我一路舉手想要打，係佢哋信我唔過，所以唔俾我打！」
家輝哥聞言展示雙手護腕幽默道：「你睇吓，就係佢哋咁信得過我，所以要戴護腕！（真係拍戲受傷嘅後遺症？）唔係，係因為要抱兩個孫，因為佢哋成日會『典』！」而片中飾演警隊高層嘅黃錦燊，終於同戲中大賊「影子」同場現身，燊哥話：「導演(楊子)同我講，現正籌備續集，希望我哋再有合作機會！」
