日前傳出現年73歲嘅資深藝人羅莽突然失聯，一直所用嘅電話號碼更加係暫停使用。羅莽兩年前所拍嘅港產片《觸電》將於18號上映，電影近日亦展開宣傳，但電影公司就一直未能聯絡上羅莽，故揭發對方突然失聯一事。
電影於6號喺又一城舉行角色扮演優先場，導演梁國輝聯同林敏驄、陳毅燊（ANSONBEAN）、盧慧敏及馮素波現身戲院謝票，除咗波姐同ANSONBEAN都以Cosplay造型登場外，到場嘅觀眾亦各出奇謀，以不同造型到場。由於呢日都未見羅莽身影，不禁令人擔心其狀況，對此林敏驄就喺活動上代為報平安，指監製已經搵到羅莽嘅身邊人，並稱對方只係電話壞咗，冇事，叫大家放心。
至於喺最新發佈嘅花絮中，除咗展現現實電競比賽世界與遊戲場景交錯外，眾演員亦有分享拍攝時嘅點滴，當中有份演出嘅柯煒林笑言：「後空翻、雙槍動作我好想做，但我太懶，加上有啲骨質疏鬆，做唔到，交俾你啦Bean！」而林敏驄與伍詠薇對戲時會即興爆肚：「賣你去柬埔寨！」至於身兼策劃、原創故事、動作指導及演出嘅羅浩銘，表示：「最特別係戲中劃分現實與遊戲世界之間穿梭。」
而為回饋及鼓勵觀眾入場支持本地電影及戲院，《觸電》於大部分香港戲院及澳門指定三間戲院上映時，票價最高為港幣$60（包括優先場）。詳情請密切留意《觸電》Facebook或Instagram專頁，以及各院線或戲院網站。
