呂慧儀之前同《愛‧回家之開心速遞》熊家人一齊食生日飯，意外得到周潤發親手整長壽麵，令佢非常開心，不過仲有一個人興奮程度可能都唔輸阿蟹，就係佢劇中嘅老公「龔燁」張景淳啦！
事關當日在場嘅景淳，有把握機會「自肥」，同發哥影張招牌selfie，仲喺IG寫下長文細數對發哥嘅喜愛同尊敬，「細個小學放學已經有睇下午重播嘅《上海灘》，最後大結局出門口被亂槍掃射係我最難接受，點解主角會結局最後被亂槍掃射，仲無仇報，困擾咗小朋友嘅我好多年」。
景淳煲過晒發哥嘅港產片，最鍾意係《喋血雙雄》因結局太慘，之後翻睇只敢睇一半，冇辦法睇晒完整版。而自己睇得最開心係發哥同哥哥張國榮合作嗰套《縱橫四海》、經典喜劇《精裝追女仔》，佢唔只笑到抽筋，仲翻睇咗超過20次。
景淳提到發哥最令佢尊敬嘅係隻身闖荷里活發展，「一樣可以喺荷里活資本製作嘅唔單止發哥招牌槍戰動作戲，連文藝片同劇情片一樣係王級演繹」，景淳話當年發哥第一套荷里活電影《血仍未冷》(The Replacement Killers)上映時，自己正喺溫哥華讀中學，特登搭車去市中心睇戲，「作為16歲嘅在加港青已經覺得好proud」，字裡行間盡顯對發哥嘅喜愛！
