執導1991年上映經典電影《跛豪》嘅 潘文傑 導演，於9月9號傳嚟佢喺北京逝世消息，終年69歲。潘文傑嘅恩師 蕭若元 亦喺個人頻道憶述兩人合作嘅往事，而電影人 陳穎倫 就喺社交平台分享一張兩人黑白相合照悼念故友。
潘文傑於1979年加入麗的電視，任職助理編導，三年後加入TVB擔任劇集《天龍八部》編導。1983年加盟新加坡電視台工作，參與連續劇《霧鎖南洋》製作。1984年回流返港，擔任連續劇《新紮師兄》編導。1988年導演首部電影，由許冠英及董驃主演嘅《奸人本色》。1990年再執導周星馳同莫少聰主演嘅《龍鳳茶樓》。
至於最廣為人知嘅電影作品，當然係佢1991年執導嘅黑幫傳記電影《跛豪》，呂良偉戲中嘅演技，以及為角色而增40磅，頓成當時熱話，票房亦取後3,800萬佳績。潘文傑亦憑此作獲得第十一屆香港電影金像獎嘅「最佳導演」提名，而電影最終奪得「最佳影片」殊榮。
