鄭子誠 喺熱播劇《俠醫》嘅角色狡猾好色，衰得搶眼，但現實中嘅佢其實係愛妻好男人一名。日前子誠孖住太太 劉倩怡 出席精神科醫生 麥永接 嘅新書發布分享會，細談調節心靈方法！
作為「音樂情人」嘅子誠推廣大家多聽歌外，更認為大家應該要放慢生活節奏，先可以搵到適合自己嘅步調同節奏，從而得到安穩。至於倩怡就曾經用旅行方式舒壓，更有一次係喺911第二年去到阿富汗，當地所見所聞都令佢有好深體會好深。
子誠同倩怡都係愛狗之人，為咗照顧愛犬都好耐冇出遠門旅行。不過倩怡就好難忘 2018年同子誠去意大利，因為老公做咗平時好少做嘅事，就係不停幫佢影靚相！子誠就大讚，老婆喺去旅行時係最靚嘅，呢一句真係好閃啊！
子誠喺8月中時出Post分享同苑瓊丹、黃智賢合照，仲話「三十年前是一家，三十年後真情再遇」令唔少人都以為係《真情》劇組再聚會，但子誠就話其實係一場偶遇。當日佢先遇到黃智賢，二人傾傾下再遇到苑瓊丹。呢場偶爾發生嘅相遇都令佢覺得好難得！
