《中年好聲音3》實力唱將李金凱雖然後天殘障，但性格樂觀，一向備受觀眾喜愛，佢更不時拍片同粉絲分享生活。但金凱日前喺社交平台Post嘅一段片就差啲釀成家居意外，令粉絲睇到心驚驚。
金凱近日放假返雲南老家，本來想拍片同大家分享家鄉夕陽美景，金凱仲話：「生活的美好從來不在遠方，而是在眼前。」之但係金凱嘅開窗方法就好危險。事關金凱走到梳化上開窗，當佢喺窗邊用腳推窗一刻，身體突然失平衡向前傾，好在金凱反應夠快，可以迅速保持平衡，先冇釀成悲劇！
呢一幕令唔少網民嚇出一身冷汗，特別係金凱嘅歌迷，個個都叫佢要「注意安全」、「開窗要小心，不要造成危險」，仲有人話好驚金凱隻腳一伸就飛埋落街。所以有網民建議金凱考慮安裝窗花同義肢，令生活變得更方便同安全。
