由德國導演愛德華·伯格 （Edward Berger）執導，哥連費路（Colin Farrell） 、陳法拉主演新電影《The Ballad of a Small Player》（小人物之歌），日前喺「多倫多電影節」舉行首映禮。
法拉一身吊帶露肩低胸紅色晚裝出席，美艷搶眼成為拍攝焦點。法拉首次出席該電影北美首映，現場座無虛席，坐滿千七位以上觀眾，佢見到唔少當地華人fans特地到場見偶像一面，令法拉感覺份外有親切感。
法拉自電影完成後，已整整一年冇同劇組台前幕後見面，今次再與男主角哥連費路、導演一同出席電影節，猶如老朋友敘舊，法拉首次喺劇院欣賞呢部新作，完全感受到觀眾對呢部戲嘅反應同熱情，令佢覺得好感動。
觀賞完電影後，觀眾踴躍發問，其中問到咩吸引法拉演出戲中角色同心得？法拉坦言其所演嘅角色係一個背景坎坷，但具神秘感嘅女子，導演由創作到拍攝過程中，給予大家無限想像空間去演繹同發揮，讓法拉感到好有趣有滿足感，加上梳、化、服及美術等一致配合，整件事好完美。
有觀眾詢問點解男女初次見面便互相吸引，法拉稱人與人之間嘅緣份，有時好難解釋，有時冥冥中安排，而兩人相遇一刻剛好喺人生路上感到失意，彼此互相憐憫同吸引。
是次劇組獲賭場破天荒給予好大嘅拍攝空間，呈現賭場畫面同特色，讓觀眾大開眼界，法拉指呢套電影分別喺澳門同香港取景，拍攝唔少特色地點，包括澳門天后宮、香港獨突嘅棚屋等，極具亞洲色彩。
一班法拉fans更拎住唔少偶像珍藏，有溏心風暴DVD、尚氣電影海報、CD等到現場俾法拉簽名，法拉與fans難得一聚，佢哋同傾咗一陣，法拉好感謝fans一直嘅愛戴。
該片改編自同名暢銷小說，故事講述賭徒Lord Doyle喺澳門賭場日夜蒲，又酗酒，揮霍僅剩一點錢。Lord Doyle喺賭場遇上由陳法拉飾演嘅神秘賭場放債人，有着不可告人嘅秘密，最後法拉向Lord Doyle伸出援手，而泰達·史雲頓飾演嘅私家偵探對哥連法奴緊追不捨，要揭露佢所逃避嘅一切，電影喺亞洲地區取景，包括香港丶澳門。