9月12號係一代巨星哥哥 張國榮 嘅生日，而今年係哥哥嘅69歲冥壽，佢嘅摯愛 唐鶴德 一如往年，踏入9月12號就分享一張哥哥生前慶祝嘅相片，而今年嘅生日照似係哥哥某年某月喺泰國慶祝時畫面，喺唐唐嘅post入面，仲配上一班人為哥哥祝賀嘅聲音：「哥哥，生日快樂！」
對哥哥有思念之情嘅又豈只唐唐一人，全球嘅「哥迷」同「後榮迷」都以不同方式緬懷偶像嘅風采，即使哥哥已經離世咗大家22年，但呢份寵愛張國榮嘅心意絲毫無變。
今年適逢係哥哥69歲冥壽，亦係佢「熱•情」演唱會25周年，以及30年前推出復出專輯《寵愛》嘅日子。喺香港，有三位同屬「哥迷」嘅兄弟，藉住呢個有代表性嘅年份，以「張國榮再現經典熱·情光影展」及「繼續寵愛・張國榮三十周年光影展」作主題舉行懷舊展，同大家分享哥哥這些年來嘅點滴。
