本地大型女子偶像企劃「偶像女生」Idol Girls，宣佈將於本月20號舉行首場專場表演—《偶像女生 920 Pinky Promise》 勾指約定。
演出將由偶像女生一期生賣力出演，涵蓋分隊表演、原創舞台演繹及全團壓軸曲目，並設有粉絲互動應援環節，而同場官方亦將宣佈偶像女生一期生新一輪特別企劃。
偶像女生早前已正式成立官方 IdG Fans「 ID 」(粉絲應援團)，並為已報名參加嘅粉絲舉行咗兩場神秘小型派對，兩場神秘派對中，偶像女生一期生以Solo方式，逐一獻唱自選歌曲及自選舞步，以才能回饋一眾支持佢哋嘅粉絲。
一期生班長Cindy憶述：「由宣佈偶像女生開始，幾乎每個星期嘅周末，一大班女生都走訪各大小商場同出席唔同嘅活動，感覺好充實，又有好大班粉絲跟住我哋去唔同地方支持我哋，實在要好感謝大家。特別係戶外場地，我相信粉絲們流嘅汗水唔會比我哋少。」
對於20號嘅首場專場演出，班長Cindy指除咗會將所有心血一次過盡顯觀眾眼前外，IdG亦正特訓籌備更多新歌同舞步。小倬則透露：「聽講當中有啲神秘環節俾我哋，我哋都要到時先會知係乜，好緊張同期待呀。」Yoyo續稱：「當日嚟睇嘅觀眾會著得輕便啲，希望所有嚟睇嘅觀眾都跟我哋一齊唱、一齊跳。」
