陳豪、張曦雯Kelly、馬貫東Mark、丁子朗Karl 及 馮皓揚 等演員，呢日現身《俠醫》嘅宣傳挑戰玩射箭，劇集開播以來收視口碑雙贏，推出首周更暫時成為2025年兩線劇集收視冠軍，阿Mo同Kelly得知呢個好消息後感到鼓舞同振奮，阿Mo覺得劇中角色鮮明，好有張力，收到觀眾朋友意見話已經好耐冇睇電視，今次仲可以一家大細齊齊煲劇，重回以前香港年代睇返一啲傳統劇集，令佢好開心。
其中一幕戲Kelly要喺裝修緊嘅醫館裡面好enjoy咁扭pat跳舞，瞬間展現多個萌爆表情獲觀眾大讚超可愛，Kelly一聽到都好冧咁多謝粉絲，仲話會努力繼續可愛派福利。而戲中呢段舞蹈，Kelly話純粹即興，事前並無特別排練，只係隨心所欲去表達角色嗰種開心滿足。
劇集除咗溫情一面，鄭子誠同丁子朗兩父子嘅戲都係看點之一，一個就懦弱怕老婆又咸濕，一個就奸得黑人憎，做開奸角嘅子誠都大讚丁丁好有潛質，角色獲好評令丁丁開心得到認同，仲話收到好多網民反映丁丁一早做奸人就紅啦，之前做乜好人吖，隨後丁丁仲會有更多香艷場面，激到親吻女性長腿。老竇鄭子誠喺劇中一場自摑戲亦大獲好評，為咗拍攝呢場戲令子誠幾乎虛脫。
飾演子誠老婆又係丁丁媽媽嘅江欣燕近日甲狀腺出現問題，呢日亦未有現身活動，佢哋都希望欣欣身心健康，拍攝時就唔察覺對方有咩問題。