朱千雪Tracy現身慈善機構活動分享育兒經，話咁快Tracy嘅囝囝已經一歲幾，早前Tracy一家三口外遊時著上一件鬆身衫，望落疑似有喜，咁啱佢嘅好姊妹蔣家旻Angel早前喺日本嘅生活照又係鬆身衫肚凸凸，兩人同樣傳出喜訊。
Tracy呢日現身時否認陀B，笑指好消息只係去咗個家庭旅行，每次著鬆身衫都被傳有BB，搞到媽咪同奶奶都會打嚟了解吓，但唔係有喜，去度假旅行當然要著鬆身衫，著到太緊身食唔到好多美食。
講到好姊妹Angel肚凸凸，仲獲友人恭喜，Tracy就代為澄清話應該唔係，早幾日先同Angel食完飯，見佢個肚仲係好扁好瘦，純粹係鬆身衫，暫時幫佢澄清，如果錯咗就叫Angel自己同人講啦。
Tracy又要工作又要湊BB，但佢嘅情緒管理就好理智，仲話好明白返工受氣遇到咩都係人工包，但絕對唔會將情緒帶返屋企，對育兒亦有理智一套方式，明白小朋友唔係你可以控制，會先控制好自己心態同情緒先，珍惜與兒子同家庭相處。
