內地四大影視頒奬禮之一嘅金熊貓獎第二屆頒獎禮，日前喺四川成都舉行，今年佘詩曼憑《新聞女王》文慧心一角，同《繁花》嘅唐嫣、以及《山花爛漫時》嘅宋佳等提名電視劇單元最佳女主角。
阿佘盛裝赴會，先以飄逸鮮色靚裙同內地實力演員張頌文踏上紅地氈，跟住再以金屬色露肩晚裝參加頒獎禮。 
最終唐嫣憑汪小姐一角封金熊貓視后，宣布獎項時，阿佘亦向佢送上擁抱祝賀。對上一次見面已係2023年嘅綜藝節目《我們的客棧》嘅兩人惺惺相惜。 唐嫣曾先後憑汪小姐一角提名白玉蘭獎同金鷹獎嘅視后提名，但係都同獎項擦身而過，入行20多年嘅佢終於成為「含金量女演員」。
唐嫣上台領獎時表示，汪小姐係可遇不可求嘅角色，多謝王家衛導演畀佢呢個鮮活嘅角色，亦係佢從影以來最寶貴嘅經驗。頒獎禮後佢仲喺微博度發表感言指:「時間讓所有的等待都更有意義」。唐嫣獲獎後更同工作人員舉慶功宴開火鍋派對，仲有開香檳慶祝，大夥兒喺祝酒時重現汪小姐嘅劇中嘅金句，以正宗上海話一齊講「經常慶功就能成功! 」 慶功宴嘅片段仲一度衝上微博文娛榜嘅熱搜。
另外吳鎮宇亦憑內地劇集《邊水往事》嘅演出榮封金熊貓視帝，但係鎮宇未有到場領獎。
