菲傭界熱話: P-Pop頂流男團SB19首度訪港開唱 五子宣布再來港換大場開騷

菲律賓頂流男團 SB19 首度喺香港開騷，成為在港工作嘅菲傭姐姐界熱話！SB19呢隊五人組合可以話係P-Pop(菲律賓流行音樂界)之王。佢哋唔止係首隊登上美國Billboard全球數碼歌曲銷售榜（World Digital Song Sales Chart）嘅東南亞組合，2018年出道嘅佢哋官方Youtube頻道嘅Followers更高達410萬。

五位成員Pablo、Josh、Stell、Ken同Justin，除咗Josh之前嚟過香港，四位成員都首次來港，佢哋周末喺香港連續兩晚開騷，一班姐姐Fans除咗搞咗巴士車身廣告應援之外，更拉晒Banner去機機接機。有基金會更派飛贊助一群默默為香港家庭付出嘅外籍家傭。

因為大部分支持者都係來自菲律賓嘅「姐姐」，所以大會貼心安排演唱會喺下晝五點就開場，等「姐姐」唔駛咁夜回程。一眾歌迷投入睇SB19嘅勁歌熱舞，成個場地十足十大型舞池一樣。

歌迷們亦有喺觀眾席度拉起以中英文寫上「六年熱愛 六年赤誠 SB19 終於同我哋身處同一星空」嘅Banner，令五子相當感動。而SB19亦喺騷上宣布好消息，話會再度訪港之餘，仲會喺更大嘅場地度開騷呀。