話題節目《女神配對計劃 最後告白》播出大結局，大家好喜愛嘅 曾展望(GM)同 葉蒨文 (Sophie)CP配對成功，Sophie毫不猶豫全心走向GM，認定對方嘅告白場口甜蜜指數爆燈！Sophie希望人生中同GM有無數個約會，而GM就指出每次約會都會同Sophie 講「我愛你」，仲係連講3次，加上GM最後嘅深情咀嘴，簡直係男友力十足。
配對成功後兩人接受訪問，被問係咪官宣拍拖時Sophie即含羞點頭，GM就霸氣地話「係呀」！ 其實Sophie對GM忽然認真喺告白時連講三次我愛你感到驚訝，仲話當時唔知自己做緊咩，相信Sophie經已冧到一片空白喇。
羅毓儀 (Yuki)同 林俊其 (Kris)呢對亦順利配對成功，Kris仲直接問Yuki可唔可以做自己嘅女朋友，不過告白中嘅內容有一段令Yuki有少少嬲。因為Kris指自己決心做Yuki呢個太陽背後嘅月光，一直守護女神，不過Yuki就希望關係變成雙向付出，自己都可以守護男方。
喺阿Bob倒數十秒時，Yuki亦係好快轉向Kris，佢透露一早經已決定好，呢日仲專程戴上Kris喺最後約會時送畀自己嘅心動頸鏈。
梁敏巧(Maggie)同暖男律師Matt呢對「M&M CP」最終喺埋一齊，不過Maggie足足幾秒後先轉身，就一度令Matt相當擔心，懷疑係咪自己之前講錯說話。Maggie坦言之前見證幾位姊妹嘅對白太感動要時間平伏心情作出決定，所以先遲咗轉身。
而關嘉敏同李芷晴雖然有Matthew同Jacob表明心意，但係最後兩人都未有轉身，佢哋都話時機未到，唔會急於投入戀愛。Carman雖然形容Matthew係「對的時間遇上不對的人」，但係事後佢對Matthew開黃燈，坦言之後可以再了解一下。聽到Carman對自己開黃燈，Matthew即時喜上眉梢。 反而Carman喺節目中力追細John，但最後將佢放入Friend Zone，笑言關係更加長久。
細John 、Matthew、Jacob同Eddie雖然未有成功追到女神，但係就講笑話可以憑住顏值組成新男團L4 (Lonely Four)。
節目咁成功，金牌媒人林盛斌(Bob)功不可沒，佢好開心見到女神同求愛勇者們喺心態上同人氣上成長，佢希望如果有第二季，可以邀請40+嘅女神們參加。
