《女神配對計劃最後告白》噚晚播出大結局，五對組合中有三對配對成功，當然有大家好喜愛嘅曾展望（GM）同葉蒨文（Sophie）CP深情咀嘴，令所有觀眾都看到面紅紅。
大家超級喜歡嘅GM同Sophie呢對GS CP順利配對成功，節目後GM喺網上發文感謝Sophie，多謝Sophie喺佢最低谷無條件相信對方，支持佢呢個屁孩，「你係我想自己長大嘅原因，因為我想你以後可以做小女孩嘅角色，我會繼續努力，努力到你唔使努力，多謝女神配對計劃，令迷失嘅我搵翻自己同埋自己想珍惜嘅人，最後多謝你哋咁多位咁支持我哋」， 而Sophie亦甜蜜回應：「加油！ 一路做你嘅後盾❤️」
GS CP嘅粉絲團GPS為咗祝賀兩人配對成功，仲喺旺角上海街嘅戶外屏幕度落廣告一星期，來自18個城市嘅77位GPS共同準備咗呢份真誠純粹嘅禮物送畀GM同Sophie，祝兩人邁向1+1>2嘅美好未來。
而女神關嘉敏（Carman）未能配對成功，雖然大家覺得Carman同Matthew呢對「厘米CP」相當合襯，但係Matthew超級大直男嘅性格，加上佢係名副其實嘅浪漫破壞器，未能打動Carman，事後Carman向Matthew仍開黃燈，希望再多啲時間了解彼此。
Matthew行動迅速，喺慶功宴於眾人起哄下再度向Carman示愛，雖然Carman怕醜左閃右避，但係Matthew勇敢上前示愛：「Carman我對你有Feel！」眾人加碼起哄，叫Matthew錫女神一啖，Carman之前為細John姜卓文慶祝生日曾錫過對方一啖，所以呢次為咗公平，Matthew都獲得錫Carman嘅機會，最後Matthew勇敢上前錫咗Carman面珠一啖。