元祖級烹飪界猛人 方太任利莎，喺八、九十年代教識唔少香港人煮返兩味，雖然方太已經淡出幕前，但係佢嘅囡囡阿寶就為方太開咗個專頁，不定時會更新媽媽嘅近況。
阿寶日前就PO出為方太慶祝91歲生日嘅照片，相中戴上珍珠頸鏈同耳環嘅方太，對住鏡頭微笑切蛋糕，而阿寶就企喺媽媽背後一齊合照，阿寶喺帖文中寫道：「今年媽咪生日，我們陽曆農曆也慶祝了，還在正日前一天全家人吃了一頓素菜（還好安排了暖壽，因為正日白天掛了八號風球），晚上按照本來計畫，去了吃自助餐😁明年要繼續慶祝🪅🎉」
翻看阿寶之前嘅帖文，原來喺母親節時，阿寶曾經發長文指方太去年曾病重留院，當時方太喺醫院留院20日，阿寶指雖然去年都有唔少媒體詢問方太嘅身體狀況，但由於當時要專心照顧方太，所以未有細說，直到而家方太已經完全康復，阿寶先決定分享自己嘅感受。
阿寶表示當時方太因為發高燒，而私立醫院要求發燒嘅病人必須入住私人病房，但由於當時醫院無病房嘅關係，於是就拒收方太：「各處鄉村各處例，人家有自己的規矩，我絕對尊重。讓我很反感的是，當時醫務人員沒有跟我們說，這位病人今天必須儘快入院。」
阿寶稱當佢哋為方太搵到醫院，並入住數日後，先收到拒收嗰間醫院嘅電話，指佢哋有費用未繳付，當時阿寶根據對方提示，喺方太嘅報告入面搵到夾住嘅單據，亦係呢個時候阿寶先睇到醫生喺病歷嗰一欄寫上「sepsis（敗血症）」嘅字眼，佢喺帖文中寫道：「當然，事後我的醫生朋友告訴我，方太的情況應該還沒去到 sepsis 敗血病那麼嚴重，但血液感染了卻是事實。那一刻我很憤怒，但也很慶幸：當天陪著媽媽進院的除了我，還有二姐和二姐夫。」阿寶強調對老人家嚟講，咁樣嘅感染有機會令病情喺將小時內急轉直下，所以令佢生氣嘅原因，並唔係因為醫院拒收，而係醫務人員冇同家人講明事情嘅嚴重性。