林峯嘅世界巡迴演唱會喺9月尾就喺廣州開鑼，而第二站嘅佛山站因反應熱烈，阿峯宣布加開一場。 阿峯忙於準備演唱會外，不忘同好兄弟聯誼，早前吳啟華喺微博曬出同阿峯、黃宗澤（Bosco）同吳卓羲聚會嘅合照。
對上一次四人合體經已係一齊作客內地網上節目宣傳劇集《執法者們》。四位打扮相當輕便，網民大讚四位港劇男神保養得宜，吳啟華61歲、吳卓羲46歲，林峯同黃宗澤45歲、「歲月係一把殺豬刀，但對港星格外溫柔」。
網民估計呢張合照係唔係未來開騷，嘉賓名單提早預告！？最近阿峯為咗宣傳廣州站個唱，佢有同網紅托哥比拼椅子舞，阿峯仲帶埋自己張私伙櫈，親眼見到阿峯展現柔軟嘅腰力，托哥都甘拜下風。
