TVB戀愛真人騷《女神配對計劃》喺9月14號晚播出大結局，唔少觀眾同網民為五位女神嘅決定而一齊笑、一齊喊。身為節目主持嘅「金牌媒人」阿Bob（林盛斌）經過一日沉澱後，就撰長文寫出感言。阿Bob話好耐冇試過一個電視綜藝節目嘅大結局，感覺上好似有好多好多人睇，喺所有社交平台洗版。
節目終於完咗，阿Bob記得當初監製搵佢傾呢個企劃時，佢已知道呢次可能係主持過咁多節目入面，最容易做、亦係最難做嘅一次。阿Bob覺得容易係因為唔多嘢要記同埋講，加上係錄影節目，唔似做現場大騷咁大壓力。至於難做係冇預設嘅故事，一路發生好多意想唔到嘅事，亦唔可以用平時輕鬆搞笑玩嘢嘅主持手法去處理，要好好去調教自己講嘢語氣同速度。
阿Bob形容自己呢幾個月似做咗心理醫生，喺鏡頭後管理同疏導女神同參加者們嘅情緒同心情，超越咗平時做主持或者司儀嘅能力範圍。不過阿Bob話好彩遇到厲害嘅製作團隊，再加上一班女神們同求愛勇者嘅真心真誠付出，令呢一個節目由本身可能冇乜人特別睇好，變成過去呢三個月好多觀眾同網民茶餘飯後嘅話題。
最後，阿Bob相信呢個節目帶出一個重要訊息，就係「每一個選擇，每一個決定，都係好重要，只要跟隨住自己內心最真實同最真誠嘅感覺，無論最後嘅結果如何，個結局係點樣都好，每一個人，都值得擁有自己嘅幸福，每一個人，都有決定自己幸福嘅能力」，唔知道呢個節目有冇令大家相信返愛情呢？阿Bob亦問大家一句「唔知大家覺得我主持呢個節目，做成點呢？我呢個金牌媒人，做得好唔好呢？」
