前華姐苟芸慧早前承認同「富三代」兼賽車手陸漢洋辦理離婚，日前苟姑娘現身一個慈善活動時，被問離婚手續進度，佢就開心承認「都解決咗」，宣布正式回復單身，並且感謝大家關心，大談對工作同愛情睇法。
苟姑娘表示目前以工作為主，即將會拍攝一個健康產品廣告，自己有興趣拍劇，但唔會為工作而行性感路線，「乜嘢年紀就要做返乜嘢年紀嘅事」，至於對愛情睇法，苟姑娘就話自己仍然相信愛情，不過抱住「緣份嘅嘢就隨緣啦，有就有，無都唔可以強求」嘅態度面對，仲話自己目前冇人追，亦好享受同四隻狗狗相處。
講到擇偶條件，苟姑娘表示要有愛心，雖然唔介意同小鮮肉談姊弟戀，不過自己接受最大年齡差距係十年，如果相差太遠，喺溝通時好難明白對方。
