添Sir張佳添 月中被影到跟 甄采浠 喺商場繞手攬腰行街，餐廳撐枱腳時又一杯咖啡兩份飲，關係儼如情侶甜蜜，兩人更被指已經發展咗一年地下情。不過添Sir就否認戀情，並以「膊頭之交」形容兩人關係，佢更指自己單身八年，但永不孤單。至於女方就未有任何回應，近日喺社交平台貼上喺病房相片，不過就未有透露入院原因。
正當大家覺得「膊頭之交」關係轉淡時，兩人都被發現佢哋同框現身。戀愛真人騷《女神配對計劃》日前播出大結局，而呢兩位緋聞男女就喺社交平台，各自分享當日喺現場見證大結局嘅相片。甄采浠喺社交平台PO出同「囡囡」Yuki羅毓儀 與 Kris林俊其 嘅合照，並於帖文中對Kris喊話：「🫶🏻交個女俾你啦，公主請天天開心！🫶🏻」
而添Sir則笑言自己雖然係一個麻甩佬，但同時佢都係關嘉敏嘅閨蜜，呢晚佢就以「閨蜜團」之名去撐對方。
雖然添Sir同甄采浠喺同一場合，不過兩人就未有合影，要直至大合照時二人先同框出現，但就刻意分開各企兩側，似乎想低調關係，免搶女神們同求愛勇者風頭。
其實今年初，添Sir同「膊頭之交」甄采浠都喺工作上有合作，當時女方仲好開心喺社交平台分享工作相，當日佢係擔任添Sir新歌MV嘅監製一職，而呢位監製仲為添Sir補妝執番靚仔樣，可謂體貼到不得了。
