黃翠如同蕭正楠呢對人氣夫妻，每逢有佢哋出現嘅地方，就好似佢哋寶貝仔嘅乳名「蕭哈哈」咁充滿歡樂。佢哋日前就被網民野生補獲，蕭生蕭太着住魚檔圍裙現身鬧市海鮮檔，莫非兩夫婦諗住開拓市場賣海鮮搵奶粉錢？
其實翠如同阿蕭係參與以傳承為主題嘅全新綜藝節目，翠如親身體驗一下黃爸爸當年喺海鮮檔嘅工作環境，身為女婿嘅阿蕭當然都要感受一下外父當年點搵錢養大自己太太。
呢對鬼馬夫婦現身賣魚，又點會正正經經咁做生意吖，見到佢哋喺店外落力拉客，一見到目標街坊，兩夫婦就一齊築成捕魚網咁圍實目標，然後落足咀頭，務求要做得成生意，場面非常搞笑，兩夫妻亦樂在其中。
