粵劇老倌李奇峰9月17日傳出離世消息，享年90歲，阿姐汪明荃噚晚喺社交平台發文悼念故友奇哥。李奇峰出生於粵劇世家，父親李鑑潮係粵劇編劇，其母呂少紅為全女班嘅小武演員，李奇峰師承馮俠魂及楚岫雲。
阿姐回顧兩人數十載嘅深厚情誼，指奇哥一生致力推動粵劇改革與傳承，貢獻良多，大讚奇哥膽識過人，當年撮合阿姐同林家聲合演《天仙配》，之後加入八和後，阿姐亦獲奇哥一直支持同扶持，令阿姐心存感恩。
1983年首次與李奇峰見面，其後開啟阿姐粵劇演出之路，阿姐坦言當年係電視藝員，對粵劇毫無認識，獲奇哥仍大膽起用，阿姐後來加入八和會館並出任主席，於八和改革與發展嘅關鍵時期，奇哥喺理事會中全力支持，多次挺身而出，以公正持平態度協助解決爭議，成為穩定大局嘅重要力量，全力支持八和粵劇學院及油麻地戲院嘅新秀培訓計劃，為粵劇界貢獻良多。
阿姐讚奇哥目光遠大，早年已意識到粵劇需要改革與提升，跟曾與尤聲普、羅家英一同拜京劇大師李萬春為師，學習京劇技藝，同時奇哥積極推動粵劇現代化，包括縮短演出時間、改進舞台轉景、傳授傳統排場戲予新一代演員等。
阿姐讚揚奇哥係一位好前輩、好同事，更係一位好爸爸，為咗女兒做粵劇，不惜結束紐約嘅生意，返港栽培女兒，並為粵劇發展作出莫大貢獻。阿姐透露因與丈夫羅家英喜愛李沛妍，二人將奇哥女兒認作契女，令二人生活添上歡樂與陪伴。
阿姐提及奇哥呢幾年身體同記性都差咗，雖然返回紐約居住，有醫護人員照料，但係畢竟年事已高，感到安慰嘅係契女表示奇哥離世時安詳、無痛苦，就好似瞓著咗，阿姐表示大家都不捨奇哥離世，願一路好走，並祝福佢嘅家人好好保重、節哀順變。
李奇峰1935年出生於香港粵劇世家，父親李鑑潮係粵劇編劇，作品有《魚腸劍》、《劈山救母》、《肝腸塗太廟》及《乞米養狀元》等，奇哥童年隨母逃難越南，年僅8歲參加「神童班」擔演折子戲《胡不歸之慰妻》，活躍於當地劇團。1958年因安南動亂，由越南回港先後加盟多個劇團，曾赴新加坡、馬來西亞、美國、歐洲等地巡演。
奇哥於1980年為羅家英、李寶瑩及尤聲普組織「勵群粵劇團」，兼顧台前演出及擔任團長，帶領劇團遠赴北美洲及歐洲演出，開創香港粵劇團於歐洲公演先河。奇哥晚年致力粵劇創作與發展，曾任八和會館及及香港藝術發展局戲曲組審批員。奇哥妻子余蕙芬係名伶芳艷芬首徒，而女兒李沛妍亦係粵劇旦角演員。