馬國明、洪永城、徐榮及高海寧（高Ling）近日忙為以航空為題材嘅《飛常日誌2》開工，不少網民一連兩日喺香港機場見到佢哋足跡，噚日有網民捕獲佢哋喺送機大堂進行拍攝，高Ling亦有喺社交平台貼出合照，佢今次繼續飾演客運經理呂芷珊，而今日有網民影到高Ling同馬明喺詢問處嗰邊進行拍攝。
噚日有網民喺社交平台貼出機場偶遇佢哋未埋位嘅花絮，見三個男人本身老友鬼鬼，等埋位時圍埋一齊吹水，又攬頭攬頸咁，而高Ling就身穿行政上班look，拖住行李箱行嚟行去，似係劇情嘅一部分。
馬明早前拍攝預告片時，曾身穿機師制服，令觀眾好奇《飛常日誌2》係唔係同第一輯劇情有所不同，不過連續兩日有網民影到馬明身穿型格西裝，似乎故事都係延續上輯中央控制中心值班經理楊尚偉呢個角色！
劇迷心痛馬明又要忙拍《玫瑰戰爭》、又要趕拍《飛常日誌2》，更有網民一睇就知馬明好好相處嗰種，另有網民回覆：「羨慕靚湯這幾個字已經說爛了。」有不少網民問有冇蔡小姐，事緣今年初，蔡思貝與朱敏瀚去馬來西亞宣傳，蔡思貝曾透露將與朱敏瀚再合作拍《飛常日誌2》，預計年底開拍。
