戀愛真人騷《女神配對計劃》雖然已經大結局，但女神同求愛勇士嘅後續發展依然充滿話題，尤其三對配對成功CP嘅發展進度更加引起高度關注，當中兩對正式宣布戀愛ing嘅CP，曾展望GM 同 葉蒨文Sophie，林俊其Kris 同 羅毓儀Yuki 就持續放閃，滿足大家嘅要求。
GM同Sophie呢對GPS(GM plus Sophie)組合，由節目開播就擁有大批支持者，為咗祝賀二人配對成功，粉絲集資喺旺角嘅大型銀幕買廣告，播放二人喺節目中嘅甜蜜片段，呢對小情侶亦親自去到現場打卡，甜度直頭爆表。
Sophie話好鍾意粉絲叫佢哋「GPS」，「我哋一聽到就好鍾意，因為我哋認為一段美好嘅關係喺成為彼此嘅人生導航，浪漫之旅雖已啟航，但未來仲有重重難關，希望無論遇到幾多困難同考驗，May we always find our way back to each other。」
而Yuki同Kris就開始以情侶檔姿態接job，繼之前合作為Yuki嘅新歌《女神之翼》拍MV，近日二人更拍住拍攝眼鏡廣告，拍攝期間一對小情侶不時打情罵俏，連攝影師都講笑話快有糖尿病。Yuki仲講笑「你哋不如都帶返副太陽眼鏡，怕『閃』親你哋！」
而情侶合作自然特別有默契，唔少親密舉動例如頭貼頭、攬肩等都駕輕就熟，好快順利完成，可以寓工作於拍拖咁開心，唔怪得Kris同Yuki話希望希望多多益善啦！