星期五晚嘅《盲盒鐵路遊》 馬貫東 先於節目當中懷念已故嘅外公外婆，又寫明信片向公公同婆婆報告自己事業發展不俗，更於2023年台慶頒獎禮以《破毒強人》嘅「杜飛」一角獲最佳男配角同飛躍進步男藝員，艱苦努力多年事業站穩陣腳，期間更落下男兒淚。
於單親家庭成長嘅Mark，星期六突然於社交平台公開丁父憂，一向對家庭低調嘅佢，公開當年爸爸抱住自己嘅童年照片，另一張則於火葬場身穿孝服，佢寫道：「當年，你雙手抱住我，帶我嚟到呢個世界。現在，我雙手抱住你，送你離開呢個世界。老竇，一路好走🕯️」。
Mark自細與母親同兩姊長大，07年加入訓練班默默耕耘，仲曾提過一直獲媽媽同家姐支持自己埋首拼搏事業，網上不時分享姨甥女嘅成長畫面。佢多年來先後參演過《愛．回家》、《鐵馬戰車》、《那些我愛過的人》等劇集，最近則於《俠醫》現身扮演陳豪好友梁彥祖。
