駕駛電單車近年再唔係男士專利，娛樂圈中都有唔少鐵騎女神，好似 蔣祖曼 就喺3號風球下順利完成路試，考獲電單車駕駛執照喇。平日予人感覺硬朗嘅Joman喺拍戲時可以千變萬化駕馭唔同角色，但現實中佢堪稱係位絕世好媽媽同好老婆，平日唔使開工時專注家庭湊子女，今次終於可以為自己圓夢。
Joman開心紀錄自己成功考牌一刻，上載同教車師傅嘅合照多謝對方，又話：「3號風球下成功還咗個心願啦！心願單又加個了，Thank you ，又細心又仔細又淡定(見到曱甴除外)辛苦你湊女咁湊。我真係好開心呀!今晚睇車加餸慶祝。」Joman其中一張公開嘅相片除咗見到佢好好保存起頭盔外，仲見到旁邊有個書包同水樽，估計係考完車牌就緊接去接小朋友放學。
呢個喜訊公開後，唔少好友同電單車之友都讚佢勁，畢竟女性考電單車牌都唔容易，連佘詩曼都留言讚叻，蔡潔就叫Joman「車手曼」，而私下同Joman超級友好嘅唐寧就話期待坐老婆曼車尾，袁偉豪都叫Joman快啲出車。
其實圈中除咗Joman係女鐵騎之外，張寶兒、蔡少芬、譚嘉儀、蒙嘉慧、馬蹄露等都係電單車愛好者，早已考護電單車牌。
