國際大牌19號晚喺啟德郵輪碼頭舉行2025冬季系列男裝騷，現場眾星雲集包括郭富城、古天樂、許志安，韓星朴炯植等現身，身為品牌超級VIP嘅香港女首富甘比，當然都係座上客，而兩位港產型男導演馮德倫同曾國祥仲客串Model行騷。
馮德倫著住品牌最新冬裝，拎住手提包行騷，因為步伐有啲急，畀網民笑佢似趕地鐵咁，不過就算行得一般般，好在靚仔搭救，依然非常吸晴。另一位導演曾國祥就有太太王敏奕帶埋閨蜜陳瀅撐場。
新婚冇耐嘅型男Tyson Yoshi有帶太太睇騷，有Tyson Yoshi嘅地方一定有胸肌，不單止自己露，仲叫埋馮德倫一齊露，見Tyson扯開馮德倫嘅恤衫，似乎想同佢「鬥波」，而馮德倫亦露出鬼馬表情，非常逗趣。
