「童顏女神」羅毓儀（Yuki）同林俊其（Kris）喺TVB節目《女神配對計劃》配對成功，兩人光明正大放閃，連帶人氣急升，Yuki趁勢推出新歌一舉兩得。近日Yuki接受電台訪問透露參與真人騷除咗求愛之外，爭取曝光亦係主因之一，大爆有呢個機會上節目全靠好友陳瀅Jeannie。
Yuki坦言團隊目標最初唔係自己，而係陳瀅推薦先成為五大女神之一，Yuki拍《臥底嬌娃》時同陳瀅成為好朋友，Yuki續道：「有次一齊去張曦雯屋企玩，咁啱團隊打嚟搵陳瀅參加，陳瀅開住speaker同佢哋傾，大家起晒哄，當時我飲咗少少酒就話我想參加。陳瀅真係好好，再幫我同團隊傾，之後監製就搵我casting。」
雖然節目後Kris遭連還爆出情史，更被封為「港姐殺手」，但Yuki百分百信任話：「講真，打從心底唔介意！每個人都有過去，唔需要考究，focus過去係冇必要，應該要focus現在。我有問過佢，但唔代表我介意。純粹想了解大家嘅過去，佢嘅過去可能太擔心另一半感受，一直唔夠膽表達自己，到呢段關係我就畀多啲信心佢，同佢講『我想聽你講嘢，唔好收收埋埋』。」
Yuki同Kris配對成功前拍過四次拖，談及與前度四年情玩完，Yuki禁不住淚崩：「分開好多因素，可能大家步伐唔一致，前進到有好多落差、期望同失望。」Yuki指與前度互相有失望，當時佢諗到結婚、生兒育女，但雙方未準備好。
至於三年前，Kris早已亮相Yuki及前度嘅頻道，Yuki指當時冇特別感覺，亦驚訝Kris於配對騷中自爆好早喺台慶期間已留意自己，直至拍節目第一集海選時就被Kris吸引，又話自己內心好脆弱，一直keep住用動漫同笑容掩飾自己，透過節目慢慢互相了解。
另一方面，Kris亦喺社交平台發長文吐心聲，指《女神配對計劃》嘅旅程走到終點，心裡充滿不捨與感激。佢喺呢段特別經歷好似一趟突如其來嘅自我探索夢幻之旅，過程中有驚喜、有猶豫、有真誠嘅對話，亦好需要勇敢嘅時刻。
Kris直指Yuki令佢直視自己內心，學習更坦誠地溝通，更清晰地了解自己真正想要啲咩，唔單只係一場配對，更係一次關於「愛」與「被愛」嘅深刻學習。
Kris多謝整個團隊及觀眾陪住佢走完呢段路，對觀眾每一句鼓勵、每一個觀賞節目的感情，甚至係一聲嘆息，都成為呢個夏天記憶裡最溫暖嘅部分，仲話而家唔係結束，而係一個新開始。