TVB歌唱真人騷《中年好聲音》系列，吸引唔少唱功一流嘅隱世中年參賽者參加，呢日舉行《中年好聲音4》記招，經過激烈海選，由超過6300位報名者當中，包括大灣區賽區、香港賽區、新馬賽區及美加澳賽區，130位參賽者殺出重圍，呢日正式亮相記招。
總經理曾志偉特意到場支持，今屆參加者當中不乏熟悉面孔，歌手陳逸璇、陶枳樽及可嵐笑指佢哋唔怕鏡頭，可嵐就話人到中年有啲老花睇唔到，上年佢都有參加，今年捲土重來，可嵐覺得好驚喜，一度擔心自己入唔到圍，冇同仔女及朋友講呢件事，身邊嘅陳逸璇好開心入到100強，收到電話嗰刻好興奮，陶枳樽轉行4年半，今次再努力追夢。
化妝導師麥曉東、獨立歌手李白、配音員何晶晶、陳旭培、《中聲2》11強止步嘅前歌手鄭梓浩胞弟鄭康淇等都有入圍，而配音員何晶晶喺新秀歌唱大賽曾擊敗鄭俊弘，獲得「金咪大獎」，而陳旭培就覺得配音員嘅工作對唱歌用聲係幫助。
來自馬來西亞嘅鄭仲豪、來自大灣區嘅金紫麟、來自加拿大溫哥華嘅莫煥基，佢哋都想為自己賽區爭氣；今屆有多位高齡參賽者入圍，當中72歲導演宋豪輝曾執導TVB劇集，輝哥指呢幾年好鍾意唱歌，被朋友鼓勵參賽，呢次佢參賽係希望鼓勵阿女同孫女做嘢要有決心、勇往直前，而另一參賽者林守常從《中2》開始一直有報名，今次終於入圍100強，來自新加坡參賽者郭哲宏今次同阿女郭美汐一齊入圍。
今年新增TVB藝人賽區，相信一定帶畀觀眾新鮮感，主持車婉婉好期待《中聲4》，笑指有「小辣椒」谷婭溦打頭陣把關做評審，覺得一開始就好好睇，谷婭溦亦自封畀分「手緊王」，而海兒做評審就話同上年一樣，都係應畀就畀。
