由亞洲電影大獎學院 同 第30屆釜山國際電影節 聯合主辦嘅「香港之夜」，星期五晚於釜山 Paradise Hotel舉行。活動由特區政府文創產業發展處以及香港電影發展局資助，同時獲香港貿易發展局支持，亦係影展嘅重要交流活動之一。
即將會獲頒山茶花獎嘅 張艾嘉 與逾600位來自世界各地嘅電影人、媒體、策展人同業界代表即席交流分享，場面熱鬧。
張艾嘉今年以監製身份帶領新作《他年她日》於影展舉行世界首映，亦於影展開幕禮榮獲「山茶花獎」，表彰佢作為女性電影人對亞洲影壇嘅重要貢獻。張姐於「香港之夜」致辭時表示：「《他年她日》喺釜山首映，對我同整個劇組都意義非凡。感謝電影發展局『薪火相傳計劃』支持，令資深電影人可以同新一代導演攜手創作。」佢又提到新片嘅創作靈感：「《他年她日》最難得係同新一代導演合作，喺過程中學習點更有效分配資源，思考拍攝之外延伸嘅可能性。」
除張艾嘉外，嘉賓亦包括演員舒淇、張震、李心潔，以及國際影人劉台午、Justin Min等，今年亞洲電影大獎主題係「Together We Dare」。而講到最充滿勇氣嘅挑戰時，張震就憶起《道士下山》一場高空威吔戲：「那根威吔拉得非常長，足足十層樓高，要飛過屋頂，真的是一次很大膽的挑戰。」舒淇就指自己最大勇氣來自身份轉換：「第一次做導演係一次好勇敢嘅嘗試。我覺得有夢想係最美嘅，有夢想就要去追！」
而四位受邀參與「釜山亞洲內容暨電影市場」交流單元「Producer Hub」嘅香港監製包括張潔妮、蔡浩泉、莊淑芳同王延明亦與其他製片代表積極互動，進一步推動合製與合作。