譚玉瑛靠鍛鍊肌肉強化機能 感激關曜儁半年前窩心私訊

譚玉瑛雖然年過60，但外貌同身型保養得宜，全因熱愛運動兼正面心態。不過今年初，譚玉瑛就發生意外，喺跑樓梯時不慎跌斷腳，經過一個月留院治療及回家休養，早前經已復工。

譚玉瑛喺社交平台分享多張喺健身室做運動嘅照片，相中佢落力鍛錬，完全冇受腳傷所影響。譚玉瑛話現況係練習加練習，由於有進步，所以更加鼓勵自己不斷鍛鍊肌肉，佢又指現時嘅私人教練 關曜儁Leo ，喺佢受傷嘅時候就已經傳訊息畀佢，主動提出要為佢鍛鍊，終於半年後Leo每星期都指導自己，因為有進步，所以特別感激Leo，原來有教練指導同針對性嘅訓練，實在有用。