關智斌Kenny 近排為咗演唱會頻頻操肌，呢日佢出席活動，雖然著住長袖衫，但佢嘅肌肉線條都若隱若現，Kenny仲講笑話如果著童裝，可以更突顯佢嘅身型，會畀人感覺大隻啲，問到佢會唔會盡量少布配合大家要求？Kenny就話知道大家都好關注呢一點，所以都會盡量配合，叫大家可以放心。
講到操肌呢樣嘢，Kenny大可以請教Tyson Yoshi，估唔到佢話佢真係試過同Tyson一齊做gym，佢話覺得自己同佢絕對唔係同一個level，佢話對方係名副其實嘅胸神，自己亦有感受過對方胸肌有幾澎湃，堅硬得嚟又有彈性，Kenny話有邀請對方嚟睇演唱會，但唔知對方有無時間嚟捧場，有記者就提議Kenny可以考慮請Twins嚟，Kenny當刻先知，原來Tyson特別鍾情阿Sa蔡卓妍呀。
有唔少人好奇，Kenny有無計劃請張致恒做嘉賓？不過Kenny就暗示BOYZ合體未係時候，要等大家真係同頻先可以做呢件事，但佢就無詳細解釋咩為知「同頻」，只係話「只要信不要問」，問到佢有無留意張致恒早前喺黑雨時搬雪櫃？Kenny就大讚Steven有擔當，但佢就話平時無同對方有特別聯絡，但過時過節都會send下短訊祝賀。
