由孫慧雪、陳國峰、黃文標領銜主演嘅愛情電影《愛．還記得》9月25日公映，電影由真人真事改編，更集合王瑋彤、陳頴嵐、岑珈其、奧米嘉儀、白雲等實力派演員出演。
故事講述阿文(陳國峰 飾)與阿儀(孫慧雪 飾)多年前相識相愛，卻因年少氣盛而分手。多年後重遇，阿文仍未放下呢段情，決心踏實生活。但阿儀就因父親(黃文標 飾)患上腦退化症，承擔照顧責任工作上又屢受挫折，巨大壓力更令佢出現病徵。而阿文亦因學歷難以尋找穩定工作，兩人逆境中到底能否繼續緊握彼此之手？
孫慧雪於戲中有校服造型演出，再次披起校裙嘅佢話：「校裙去到大髀，都有著PE褲打底嘅，但就要減肥拍攝。」；而陳國峰就依導演要求以長髮造型演出年少角色，情深演繹時仲被劇組稱為「國民男友」。
兩人嘅嘴戲原來仲係國峰提出：「因為成個劇本我嘅角色都好深情，套戲要有錫嘅畫面係豐富啲。」阿雪就爆大鑊話：「係囉，但係佢好怕醜，唔鍚埋嚟。我仲諗Roll咗咁耐都未錫埋嚟嘅？咁就我主動錫埋去喇。」
現實生活中，阿雪同國峰都已成家，所以對婚禮誓詞都有一番體會，阿雪話：「講到無論健康、疾病，都要繼續一齊行落去，我就即刻爆喊，喺艱難嘅時候，有時真係想放棄，你要回頭諗番呢段誓詞，同埋開頭嗰個決心，因為太多人唔會認真去對待，如果唔係唔會有80%離婚率。」國峰就指夫妻要面對好多事，最重要溝通，雙方都要為婚姻努力經營。
而飾演患有腦退化症父親嘅黃文標，坦言今次戲份較以往豐富，能夠突破「御用收數佬」等反派角色，展現入行35年嘅深厚演技。佢話：「我媽媽離世之前都有少少腦退化，我攞返啲感覺出嚟，所以都有啲媽媽嘅影子，自己都有啲感觸，媽媽不至於帶畀我好大嘅麻煩，但我都會唔開心。好似套戲入面，我食咗飯，但話畀個女聽未食，係要個女煮。」
國峰同阿雪更首次為電影合唱國語版主題曲《還記得愛》，藉歌曲展現戲中經歷分離、悔悟後重新珍惜彼此。佢哋仲坦言首次音樂合作係一個挑戰。