今個月27號係金牌監製梅小青嘅72歲生日，老公劉家豪同一眾好友李思捷、謝雪心、張頴康與太太麥雅緻、羅霖及尹光等，日前就為佢舉行一個以「燒鵝髀」做主題嘅生日派對。
原來呢個咁特別嘅主題，係壽星女早前低調入院接受手術時，許下嘅願望。小青姐喺社交平台分享生日會嘅照片，當中有每人手持一隻燒鵝髀乾杯嘅GIF圖、亦有小青姐同老公劉家豪拎住燒鵝髀嘅合照。
小青姐喺帖文中寫道：「記錄温情和別開生面的開心共聚💞 三個月前摯友問我，手術後喜歡吃什麼？我不假思索就說燒鵝髀😂還要不斬的🤣 結果，在他為我辦的生日會中🎂出現了22隻燒鵝髀😂我哋齊齊用燒鵝髀乾杯🥂」。 
小青姐亦分享自己對燒鵝髀嘅情義結，佢指因為細個睇到人哋食燒鵝髀食得好滋味，所以當佢病嘅時候，就諗如果有隻燒鵝髀喺佢面前，自己會唔會想食，小青姐指如果自己想食嘅話，咁呢個就係一個小病，自己亦會好快好返。之後到屋企環境變好後，小青姐嘅爸爸每次做佢鍾意食嘅冬瓜盅時，都會買多半隻燒鵝，而隻燒鵝髀都一定會留返畀佢。
