TVB歌唱真人騷《中年好聲音4》於9月20號喺將軍澳電視城舉行記者會，主持車婉婉、評審周國豐、張佳添、海兒與新加入嘅「小辣椒」谷婭溦現身，宣佈130位來自香港區、大灣區、新馬區及美加區嘅參賽者名單，由35歲到74歲，呢日參賽者亮相記招，大會更預告有「TVB賽區」藝人將會參戰。
歌手陳逸璇、可嵐、陶枳樽、李白及鄭仲豪繼續努力追夢，資深主持人李有毅鼓勵兒子李國煒輕鬆應戰、鄭康淇獲曾參加《中年好聲音2》嘅阿哥鄭梓浩打氣。《中聲》參加者追夢不分年齡，今年Super Senior組別人強馬壯，當中72歲宋豪輝曾任TVB導演，曾編導演員陣容鼎盛嘅劇集《大都會》、張國榮、商天娥主演《 儂本多情》等，又執導電影《Beyond日記之莫欺少年窮》、《富貴黃金屋》等，而來自新加坡嘅71歲參賽者郭哲宏與女兒郭美汐一同入圍。
今年新增TVB藝人賽區，主持車婉婉對《中聲4》寄予厚望，笑指十月懷胎嗰頭「卸貨」放鬆，感覺冇嘢牽掛唔係幾掂，點知又咁快開始。「小辣椒」谷婭溦話好難手鬆，而海兒就話今季多咗駐場歌手、音樂導師、製作人，對佢哋基本功要求高啲！
