衛蘭嘅世界巡迴演唱會喺20號舉行成都站，呢次亦係佢相隔六年再喺成都舉行演唱會，為此Janice為當地觀眾準備咗三份禮物，頭兩份禮物係兩套新歌衫，與及首唱喺華納時期嘅歌曲《呼吸之間》和《天敵》。
至於第三份禮物，就係呢站嘅驚喜嘉賓。Janice希望每站都邀請喺過去廿年嚟，喺佢音樂路上有別具意義嘅歌手擔任嘉賓，而繼古巨基、楊千嬅、側田、衛詩、李治廷、應昌佑、關心妍、Mike曾比特和丁噹後，成都站就邀請到許志安驚喜登場。
兩人12年前曾合唱歌《情人甲》，當年此歌成為年度合唱歌，而呢晚兩人就重現當年前經典。當安仔登場時，台下觀眾紛紛驚喜尖叫，Janice表示自己好喜歡對方嘅歌聲，仲話安仔喺眾多廣東男歌手中，佢最喜歡嘅其中一位。安仔亦指當Janice邀請自己做嘉賓時，自己相當開心，仲一口答應，因為好想再同Janice合唱。之後安仔再獨唱經典金曲《爛泥》，唔只觀眾聽得如痴如醉，連喺後台準備嘅Janice亦把握時間欣賞。
完騷後Janice感觸表示估唔到六年後可以再嚟到成都開個唱，對於成都觀眾嘅熱情，令佢相當感動。Janice又指每場演唱會都希望加入一啲新嘅元素：「成都站我換咗兩套新歌衫和新歌單，每個站嘅盲盒歌曲都希望送給歌迷驚喜，之後就會去馬來西亞開騷，大家估下我盲盒會唱邊首歌？」
