年屆82歲嘅武打明星陳惠敏，喺年前公開自己分別患肺癌同腦癌嘅消息，幸好而家已經康復。雖然惠敏哥嘅「江湖形象」深入人心，但佢實際上係愛妻柔情鐵漢一名！ 早前惠敏哥為太太吳國英舉行生日壽宴，宴請多位親友，雖然惠敏哥身形清減，不過氣息相當好，紅光滿面之餘仲好有中氣，夫妻雙雙向賓客敬酒，場面喜慶熱鬧。
雖然惠敏哥曾經係江湖中人，不過佢用情專一，同太太相愛相伴半世紀，二人育有三名子女，愛情故事亦同電影情節一樣。 惠敏哥後生時同只得17歲嘅吳國英認識，二人之後拍拖，喺惠敏哥捲入一宗藏械案件時，吳國英更曾為佢坐兩年監。
多年以嚟，吳國英一直支持老公事業，喺惠敏哥患病期間亦不離不棄，悉心照料，二人嘅感情情比金堅。不過兩人直到2020年先正式入紙註冊結婚，陳惠敏當時向傳媒表示，係為咗令太太有一個正式名份，亦希望將自己資產留俾太太，表達愛護同承擔之情。
