李爾晨(Kyle)客串、由白敬亭與文詠珊Janice Man主演嘅內地新劇《不眠日》近日上映，喺片中Kyle雖然同兩位主演嘅對手戲唔多，但首次拍攝內地劇集嘅佢，笑言眼界大開。
Kyle喺劇中同澳門女演員劉漪琳有一段結婚戲，由於劇情講述時空不斷循環發生，所以呢場婚禮就拍咗多個模式，當中有爆炸場面、又有開槍等，眾人連續拍咗三晚通宵，Kyle憶述當日拍攝情景：「拍攝當日真係天寒地凍，得攝氏幾度，加上海風不停咁吹，真係好凍。」佢指當日同戲中嘅新娘錫咗3、4次，但講到最難嘅地方，Kyle就話係倒香檳，單係呢個動作都倒咗3、4次。雖然拍攝過程辛苦，但唔少親友睇完Kyle嘅演出，都打畀佢大讚演出精彩，令Kyle覺得付出嘅一切都係值得。
身為健身室老闆嘅Kyle，亦大讚白敬亭雖然氣場勁，但為人相當友善，佢又指對方身形睇落雖瘦，但估唔到對方練得一身好肌肉，唯一可惜嘅就係拍攝緊湊，令佢未有機會同對傾健身心得。
而為咗喺未來可以拍多啲內地劇集，Kyle決心練好普通話，至於講到嚟緊將會播出嘅TVB新劇《巨塔之后》，Kyle話自己嘅角色將有個悲慘結局，希望觀眾留意到自己嘅用心演繹。
