35歲歌手林欣彤（Mag）近年鮮有公開露面，日前突然喺社交平台開直播30秒，驚慌地向網民求救，情緒激動連聲講「你想殺死我」，仲叫網民save條片，令不少網民擔心其精神狀態，TVB娛樂新聞台曾聯絡其經理人關心林欣彤近況。
超強颱風「樺加沙」襲港，航班大受影響，各航空公司已取消大量航班，本港機場有逾千班航機、涉及約14萬旅客受影響，今早逐步恢復航班升降。TVB娛樂新聞台今午聯絡經理人，得悉林欣彤目前安全仍喺英國醫院休息中，佢早喺當地做完幾場佈道會， 原定本周末喺當地出席教會分享會，林欣彤本身身體比較弱，又知道香港打風， 由於佢好擔心媽媽及狗狗，原以為可以提早班機颱風前返港，最後班機取消而未能上機，林欣彤情緒波動，牧師安排林欣彤入院急症室治療。
問到林欣彤幾時返港？經理人表示：「現時入咗當地醫院急症室，待林欣彤休息好，醫生檢查確定後先安排回港，謝謝你們關心。」經理人又指林欣彤情緒不穩定係因瞓醒時唔知自己身在何處，喺醫院表現激動，至於片中見到嘅鬍鬚男係接待佢嘅其中一位弟兄，牧師夫婦當時亦喺醫院。
林欣彤於2010年參加TVB歌唱比賽節目《超級巨聲2》奪冠入行，因壓力患情緒病及失聲，差不多10年一直受病情困擾，曾透露病情嚴重，進食都冇氣力，要家人協助，事業幾乎停頓，曾於2年前表示自己已康復。未想到林欣彤日前忽然開直播，見佢極度驚慌向網民求救，當時情緒激動稱「如果有咩事，我死咗唔緊要，我死咗唔緊要，我死咗唔緊要，你認住邊個係殺人兇手！認住佢，認住邊個係殺人兇手，認住佢，佢想殺死我，你想殺死我，你想殺死我……」，其間影到一個鬍鬚男獨坐喺房間角落，叫林欣彤「Calm down（冷靜）」，另有一把女聲問：「What are you doing？」直播隨即中斷，一度令網民擔心其安危。
