產後五個月嘅何依婷（Regina）呢日fit爆現身拍廣告，新手媽媽要重投工作，最大難題一定係唔捨得BB，Regina之前去咗韓國拍旅遊節目，同囡囡一分開就係十幾日。
Regina當時超級掛住囡囡，每日叫老公講send片同相，因BB大得好快，當佢返港時，經已發覺阿女個樣大個咗。Regina又話囡囡好鍾意同人傾偈，又好識畀反應人哋，所以屋企每日好嘈好熱鬧。
Regina有份演出嘅劇集《金式森林》已喺內地播出，其中一場佢同羅子溢嘅大尺度對手戲喺網上引起熱烈討論，尤其Regina超性感大露背一幕，令觀眾睇到嘩嘩聲。Regina話冇預計過大家咁大反應，拍攝時工作人員已幫佢做足防走光措施，而對手羅子溢非常專業同有紳士風度，基本上冇NG，一次過就拍好，事前Regina亦有同老公備案，老公反應係非常支持。
