謝霆鋒近日為時裝品牌擔任香港區代言人，拍攝新一輯秋冬系列廣告，以一身型格登場展示現代男士嘅生活哲學，霆鋒著型格恤衫、拎住結他擺Pose，突顯其音樂才華洋溢。
霆鋒覺得喺呢個充滿挑戰嘅時代，一定要運用冷靜嘅思維與專注，以免迷失自我：「點解我嘅音樂係我嘅音樂、點解仲有好多電影要我嚟演？我覺得喺唔同領域裡面，你必須好清楚自己貢獻啲咩，先唔會迷失。」霆鋒仲分享其價值觀：「以前會覺得我喜歡呢樣嘢，但係未必可以變成我嘅專業，但而家呢個時代，只要你喜歡上呢樣嘢，一定有方法將呢樣嘢去實現，而家冇嘢係做唔到，只係你願唔願意花時間去研究。 」
霆鋒認為每個階段嘅演出都有代表意義，因為成長令自己唔可能再重演：「我已經長大，好似《特警新人類》，或者係我十幾歲出演嘅角色，而家就算演技進步，都已經回不去當時嘅青春。唔同階段就做唔同年紀嘅嘢，每個階段都有唔同挑戰，例如現在嘗試將自己美食品牌提升到另一個層次，喺商業領域裡，我發現仲有好多新嘢，我係唔識嘅，就好似重新做一個新人，只不過係商界嘅一個新人。」
霆鋒闊別演唱會舞台20年，近日展開巡唱，霆鋒重新再開個唱時，發現舞台音響等已發展到另一程度，因此霆鋒一直保持開放心態，重新學習。
