車婉婉近排忙於主持TVB全城矚目大型歌唱真人騷《中年好聲音4》，同時兼顧工作及家庭，婉婉為見證阿仔BBQ先生喺成長中嘅進步，呢啲珍貴時間係過咗就冇，再忙都要抽時間陪伴囝囝BBQ先生，佢日前就出席阿仔學校嘅水運會活動。
婉婉同老公於9月26號一齊出席阿仔BBQ嘅學校一年一度水運會，一早起身陪阿仔食早餐，再同老公跟住去現場做粉絲，而夫婦心態係志在參與，希望囝囝盡力做好，享受成個水運會。
阿仔BBQ報咗三個項目，公布賽果時，二人為BBQ先生感到驕傲，「第一項目50自（自由式），居然游出自己嘅最佳時間，仲攞到第四名，好開心呀！第二項目50背（背泳），時間快過平時，得到第二名。第三項目25蛙（蛙式），由於前兩年BBQ先生游蛙式都唔知頭唔知路，傻吓傻吓被DQ咗，今年Q MaMa諗住畀佢建立番對蛙式嘅少少信心，報個短短哋試吓啦⋯⋯點知，佢居然攞咗個金牌」。
婉婉好開心阿仔今年攞到三個獎牌，證明囝囝呢一年嘅努力並冇白費。睇到各位小朋友一齊長大、一齊努力、一齊進步，真係好窩心、好感動。出名係「水煲」嘅婉婉，返到屋企仍難掩激動之情，分享咗一張囝囝手抱嘅相，「時間真係過得好快…… 一眨眼，8年前係一嚿蕃薯。今日做咗『金牌得主』，真係不能低估小朋友嘅能力」。
