陳煒孖老公慶祝結婚三周年 甜蜜寫上「與你永遠連在一起」

陳煒同老公陳國強醫生喺2022年9月26號結婚，眨吓眼今年係佢哋結婚三周年，適逢煒哥有份主演嘅劇集《巨塔之后》將於9月29號晚喺翡翠台播映，煒哥為咗配合劇集宣傳，一改過去兩年同老公去旅行慶祝嘅習慣。

煒哥今年改為跟老公簡簡單單喺香港過二人世界，煒哥喺社交平台分享夫婦碰酒杯相，寫上「與你永遠連在一起，結婚三周年快樂」，甜度爆燈！煒哥早前受訪時透露下月將會去澳洲宣傳劇集，屆時老公隨行，兩公婆順道喺當地補祝結婚周年。

其實煒哥同老公婚後繼續恩愛，只要大家夾到假期，就會外出旅行放假叉電，而陳醫生嘅攝影技巧了得，不時以老公視角為索老婆煒哥影靚相，仲大方喺社交平台分享，令大家羨慕不已。