由三姐蕭秀香成立嘅「中國香港女廚師協會」舉行晚宴，唔少圈中人特登前嚟祝賀三姐，包括姜大衞、李琳琳、肥媽Maria Cordero、胡楓、羅蘭等場面熱鬧。
修哥因打風外遊計劃取消，所以可以嚟撐三姐場，平時經常食三姐煮嘅好嘢，所以食到個肚腩越嚟越大，三姐就話知道修哥可以出席晚宴，前一晚開心到瞓唔着，仲即場錫咗修哥一啖。
肥媽話同三姐私底下經常交流廚藝，三姐成立女廚師協會，自己一定會支持，仲擔任星級顧問。John哥就話以前喺公司拍劇，經常去三姐餐廳食嘢。
琳琳姐自爆廚藝零分，反而John哥閒時鍾意下廚，不過John哥就話自己廚藝不及阿仔細John（姜卓文），因為細John非常用心研究，仲好有創意開發新菜式，琳琳姐亦大讚阿仔煮腐乳煎牛扒好有特色。
《中年好聲音4》日前舉行記招公布各個賽區入圍名單，一眾評判有出席，唯獨不見肥媽身影，搞到好多人擔心《中聲4》係咪見唔到肥媽，不過大家可以放心，肥媽解釋當日缺席原因，佢仲透露新一季節目已開始錄影，參賽者實力非常強勁，大家一定唔可以錯過！