高海寧趁住新劇《璀璨之城》復工前，把握機會畀自己放假好好休息下。佢28號就喺社交平台分享咗一輯於法國旅行嘅照片，並寫下長文透露呢次獨自旅行嘅心情：「看著出發前的日記，自己好像總是被某些東西束縛著，我想又是時候短暫逃離去一個完全陌生的城市，在那裡很容易享受一種純粹的自由。」
高Ling引用自己睇過嘅一本書，裡面寫嘅一句話：「我喜歡旅行者的身份，在旅行中，沒人知道我是誰，而我可以成為任何人。」高Ling指自己喺陌生嘅城市，終於可以摘下面具、撕下過往嘅所有標籤，去享受同陌生人短暫嘅相遇、交集與共鳴，高Ling形容自己終於又可以做返自己，又可以重新呼吸，同時佢唔再驚一個人去旅行，亦開始迷戀呢種自由嘅感覺。
有感而發嘅高Ling，最後喺帖文嘅末端寫道：「睡覺前看著白花花的天花板，突然意識到，人生 本來就是一趟Solo Trip，好好體驗跟感受 就好🦋」。
