昆凌 同 周杰倫 育有兩女一子，一家五口非常幸福，仲不時喺社交平台分享家庭樂，早前佢哋喺澳洲滑雪，昆凌着住厚重嘅鬆身衫，就被指疑似有咗第四胎喇。呢日昆凌現身一個活動時，就親自開腔澄清表示自己目前未有懷孕，仲話有三個已經好好，覺得要對自己身體好啲。
講到早前七夕喺墨爾本，被網民捕捉到同老公一齊行街，昆凌就話周董同自己都好鐘意shopping，所以兩人購物時都會互相詢問意見，交流睇法。不過昆凌爆周董對自己嘅衣著相當有自信，所以好少會主動問佢「我著呢套帥不帥啊？」
講到之前周董創作時，細女經常會纏住佢，昆凌指細女的確好愛爸爸，無時無刻都要陪喺佢身邊，所以昆凌表示周董製作新專輯嘅進度，都要視乎阿女干擾嘅桯度。至於問到昆凌會唔會幫手帶開細女，等周董可以專心創作？佢竟然話好享受將細女交畀周董湊，因為老公都好享受同阿女嘅互動，所以佢就唔會介入喇。
